Nos, Dr. D. Alfonso Carrasco Rouco, pola graza de Deus e a Sede Apostólica, Bispo de Lugo
Mediante a Bula Spes non confundit, do pasado 9 de maio, o Papa Francisco convocaba a toda a Igrexa ao Xubileu Ordinario Romano de 2025, baixo o lema Peregrinos de Esperanza. Segundo o establecido a este fin pola Santa Sé, con Decreto de data do 01 de setembro de 2024 procedín a determinar os templos da nosa Diocese aos que, xunto coa nosa Catedral de Santa María, poderase acudir en peregrinación para lucrar a indulxencia xubilar romana, a partir do 29 de decembro 2024 e ata o 28 de decembro de 2025, cumprindo as condicións habituais.
E, para que sexa pastoralmente facilitado o acceso ao sacramento da Penitencia e conseguir o perdón divino a través do poder das Chaves, seguindo o indicado pola Penitenciaría Apostólica no seu Decreto do 13 de maio de 2024, concedo aos presbíteros que lexitimamente escoiten as confesións dos fieis durante este ano xubilar nos devanditos templos as facultades establecidas no canon 508 §1, para absolver no foro interno das censuras latae sententiae non declaradas nin reservadas á Santa Sé. Nestas confesións téñase en conta o establecido no Ordo Paenitentiae, apéndice I, nn. 2-3, determinando penitencias sacramentais adecuadas á gravidade da censura.
Dado en Lugo, Cidade do Sacramento, a 16 de decembro de 2024
+ Alfonso Carrasco Rouco
Bispo de Lugo
