As aulas do Seminario diocesano acollerán, o vindeiro día 24 de abril ás 17h, un novo encontro do Movemento Bíblico diocesano no que se tratará sobre a figura dos profetas.
“Os profetas non son creadores de novas verdades de fe: esta fe xa estaba consolidada nas tradicións da Torá. O que fan os profetas é esixir coherencia, denunciar desviacións, deducir as consecuencias, indicar os camiños a seguir. Nisto foron intransixentes, claros e contundentes: expuxeron a inconsistencia do seu pobo ante Deus.
A loita pola xustiza é o tema que aparece en todos os profetas con maior ou menor intensidade. Estaban convencidos de que a inxustiza social no Pobo de Deus era contraria á Alianza.
Para os profetas, a historia é o lugar de encontro con Deus, porque nela Deus está presente e actuante. Os profetas son portavoces desta presenza e desta acción, aínda que o pobo non o entenda ou non queira velo”.
