Lembramos outro momento importante da festa do clero galego no Santuario de O Corpiño como foi a ofrenda dunha rosa de prata á Virxe de todos os sacerdotes e compartimos algunhas fotos máis dese día
Ao rematar a Eucaristía, o reitor do Santuario, José Criado, leu o texto da ofrenda dunha rosa de prata á Virxe de O Corpiño:
"Os bispos de Galicia e os sacerdotes ordenados despois do ano 2000, ofrecemos a Santa María unha rosa de prata e pedímoslle que ela coide a nosa vocación e nos axude a ser fieis ó seu Fillo como Ela o foi sempre.
Poñer esta Rosa nas mans da Virxe do Corpiño, simboliza poñer a nosa vida e a nosa vocación nas mans daquela que é a Nai e nos conduce a Cristo.
Virxe Santa do Corpiño ti que nunca deixas orfo a ningún fillo teu, agradecémosche que sempre velas por cada un de nós e que alentas e acompañas a nosa vocación.
Poñemos nas túas mans esta rosa en recoñecemento á túa presenza e pedímosche que sigas gardando á túa Igrexa e custodiando as futuras vocacións sacerdotais. Amén".
