Un peregrino que se transforma en anxo, unha man tendida e un lugar onde sentar. De acollida, de peregrinos e de non desviar a mirada ante os que nos cruzamos, fala a nova escultura "Be Welcoming" (“Sexan acolledores”) que quedou inaugurada o 19 de outubro no Camiño de Santiago, na localidade de Melide, Diocese de Lugo.
Situada a uns metros da Capela de San Roque, a obra é do artista canadense Timothy Schmalz, e está inspirada no tema “ser acolledor” da Carta aos Hebreos ("Non esquezades a hospitalidade: por ela algúns, sen sabelo, hospedaron a anxos", Hb 13, 2).
"Ser acolledores representa esa profunda esperanza dos que se poñen en camiño por calquera motivo. Esa esperanza que expresa moi ben a idea do anxo que non abandona ao camiñante", dixo o Bispo de Lugo, Monseñor Alfonso Carrasco Rouco, ao bendecir a escultura instalada en Melide, o lugar que el mesmo elixiu. Acompañado polo Delegado Episcopal de Liturxia, Relixiosidade popular e Patrimonio histórico artístico, José Antonio Ferreiro Varela; o director do departamento de Patrimonio Histórico Artístico, Jesús Salvador López, o párroco de Melide, José Manuel Melle Parajuá, o Alcalde de Melide, Xosé Manuel Pérez, entre outras autoridades, Carrasco Rouco reflexionou que "os peregrinos reforzan a vida das parroquias, convídannos a lembrar que somos acollidos e queridos. Convídannos a ir a Misa, convídannos a volver a mirada ao Señor, asegúrannos a acollida, a reconciliación e o fogar". Nese sentido, agregou: "Para a nosa Diocese os peregrinos que percorren o Camiño de Santiago son unha riqueza moi grande".
Unha invitación a ser máis acolledores
“Be Welcoming” é unha invitación á acollida, cara aos que máis a miúdo soportan a indiferenza dos demais. Unha problemática social que Schmalz xa traballara en “Angels Unawares” (“Anxos sen sabelo”), unha das súas obras máis coñecidas que foi instalada na praza de San Pedro e bendicida polo Papa Francisco en 2019.
Ao explicar que motivou a realización da escultura, Schmalz comentou que para el os versículos da Carta aos Hebreos son “das pasaxes máis fermosas da Biblia e esta escultura busca darlles vida”.
Unha escultura interactiva
A escultura -que foi posible grazas á doazón do filántropo John Studzinski á Diocese de Lugo- simula, a primeira vista, a figura dun peregrino. Con todo, ao rodeala e cambiar o punto de vista xorde unha nova imaxe: un anxo coa man estendida que dá a benvida.
"O anxo está representado dando a benvida ao espectador para que tome asento ao seu carón", apunta Schmalz. "Este tipo de esculturas interactivas son as que máis me gustan. Convidan a formar parte delas", explica o autor de “Let The Oppressed Go Free” e “Homeless Jesus”.
O anxo-peregrino de Melide tende a man a todo o que pasa ao seu carón e convídao a sentar, Schmalz destaca que esa man tendida “chegará a todos os peregrinos dándolles a benvida para contemplar a espiritualidade oculta en cada un”. Destaca ademais que “a escultura tamén actúa como un monumento a todos aqueles peregrinos que percorreron este Camiño buscando o anxo oculto neles ao longo de moitos séculos”.
Unha encrucillada no Camiño
O lugar onde se inaugurou a escultura está cheo de significado. Melide está considerado o centro xeográfico de Galicia e é onde conflúen a ruta francesa, que procede de Roncesvalles, e o Camiño Primitivo, que parte de Oviedo.
Neste lugar os peregrinos percorren os seus últimos quilómetros até a Catedral de Santiago, atópase a 55 quilómetros da meta, mentres gozan de paisaxes únicas e cunhas orixes que se remontan á época medieval.
